Art voish ny pabyryn: Mean Souree

Hie mee dys Balley yn Cheyllys ayns Lochabar y vee shoh chaie son feailley as cuirrey-kiaullee er Shenn Laa Boaldyn. Va shoh reaghit liorish yn er-kiaullee Griogair Labhruidh er y chroit echey hene. Chammah as goaill shenn arraneyn as cloie yn peeb, she Griogair yn ynrycan rapper Gaelgagh ayns Nalbin, as eh ny ayrn jeh’n Afro-Celt Sound System. Va mooinjer ayr Ghriogair ass ny hardjyn shoh as ren eh hene gynsagh Gaelg y voayl voish paart jeh’n çhenn sleih s’jerree va loayrt ee.

Cha leah as raink shin dys y ghlione bwaagh glass, cruinnit mygeayrt lesh sleityn as creggyn ardey, va naightyn groamagh ec Griogair dooin dy chur shin ayns cooinaghtyn dy vel ny shillaghyn aalin er fud Gàidhealtachd Nalbin keiltyn skeeal dy hoyt-mow kynney as dolley ass cultoor. Keead blein er dy henney va Gaelg ec dy chooilley unnane ayns Balley yn Cheyllys. Cha nee eirinnys ny eeastagh va cummal seose y balley: va’n chooid smoo jeh ny deiney gobbragh ayns quarral-sclate.

Chaghlaa cooishyn dy mooar tra yeigh yn quarral, as phaart yn peiagh s’jerree as Gaelg y voayl echey three mee er-dy-henney. Ta jees elley er-mayrn ayns thieyn-boandyrys ayns jiass Hostyn, as ta lane-duirn dy henn loayrtee ayns buill elley faggys dy laue, lheid as Ard nam Murchan. Agh cha voddey dys vees ny Gaeil s’jerree er çheer vooar Nalbin harrish y cheim.

Cha vel scoill Ghaelgagh ny brastylyn son sleih aasit ayns y valley, ny monney Gaelg er cowraghyn. Ta Griogair treishteil dy vod eh skeayley fys mastey’n phobble mysh y Ghaelg, as dy jarroo haink shin quail peiagh aeg ny ghaa ass y valley va gynsagh.

Va brastylyn peeberaght, fiddyl as arraneyn fud y laa. Lurg shen va’n ollagh er nyn mannaghey er aght yn çhenn earish as ad goll er imman eddyr daa aile, as Griogair shooyl rhymboo cloie yn peeb. V’eh orrin ooilley shassoo ayns daa strane er dagh çheu jeh’n vayr as ny booaghyn mollagh eairkagh gimmeeaght eddyr shin. Hug shen aggle dy liooar er peiagh ny ghaa! Lhaih Griogair shenn vannaght Gaelgagh, as lurg shen va bonnag er ny ghreddal er yn aile, as begin da’n pheiagh hooar yn pheesh s’doo lheim harrish yn aile.

Lurg shen va cuirrey-kiaullee dys anmagh er yn oie. Ta Griogair kiarail jannoo y lheid shoh keayrt elley as aigh vie lesh – veagh eh mie dy akin aa-vioghey ny shenn chliaghtaghyn as yn çhenn ghlare er fud ny çheeraghyn Gaelgagh.

Foddee shiu lhaih yn art shoh ayns Baarle ayns shoh 

 

 

Published: Thu, 01 Jan 1970